Степан Гаврильевич 1920с. Амма оройуонун Бологур нэhилиэгэр тѳрѳѳбүтэ. 1942с. Амма - Наахара 7 кылаастаах оскуолатыгар учууталлыы сылдьан фроҥҥа ыҥырыллыбыта. Онно 452-с, 718-с полкаларга уонна 1992-с стрелковай полк 713-с туспа бортинженернай батальонугар сулууспалаабыта. 1943с. Орел куорат таhыгар кини танковай пулеметунан ѳстѳѳх икки расчетун суох оҥорбута. Онно бааhырбыта. Степан Гаврильевич Кенигсберг куораты ылыыга кыттыбыта. Хорсун быhыытын иhин «Кыhыл сулус» орденынан наҕараадаламмыта. Степан Гаврильевич Назаров Аҕа дойду Улуу сэриитэ саҕаланыытыгар Чурапчы военкоматыттан 1942с. олунньу 23 күнүгэр Советскай Армия кэккэтигэр ыҥырыллан барбыта. Забайкальскай байыаннай округ 209-с стрелковай дивизиятын 452-с стрелковой полка, Харинор диэн станцияҕа үѳрэммитэ. Тохсунньу саҕатыгар 1943с Большевай стрелковой батальону кытта 718-с полкаҕа түбэhэр. Манна батальон командирыгар, старшай лейтенант Дектярёвка связнойунан сылдьар. Сэрии кэмигэр связнойунан мээнэ түбэhиэх киhини ылбаттар. Связной сырыыны сылдьарынан, ытарынан, барыны бары тулуйарынан чорбойор буолуохтаах. Саха киhитэ Степан ити уустук кѳрдѳбүллэри үчүгэйдик толорбута. Кини улахан уонна кыра Калинкалар диэн дэриэбинэ анныгар буулдьаҕа таптаран, 1943с. бэс ыйыгар дылы госпиталга сыппыта. Yтүѳрэн 1092-с стрелковай полкаҕа түбэhэн, фроҥҥа иккиhин барбыта. Курскай анныгар иккиhин атаҕар бааhыран, госпиталга киирбит. Манна эмтэнэ сытан бэйэтин биир дойдулааҕын Афанасий Петрович Ксенофонтовы кѳрсүбүт. Киhитэ сиэбиттэн фронтовай хаhыаты ылан, киниэхэ уунар. Онно бэчээттэммит: «…рядовой С.Г. Назаровы «Хорсунун иhин» мэтээлинэн наҕараадалыырга». Биир дойдулааҕын кѳрсүү үѳрүүтэ, наҕараадаламмытын билии… бу улахан дьол! Госпиталтан тахсаат, бэйэтин полкатыгар кѳрдѳhѳн, дьоннорун Белоруссияҕа ситэн, батальонун командирын кѳрсѳр. Командирдаах саллаат убай-быраат курдук үѳрүүлээхтик кѳрсѳллѳр. Степан связной быhыытынан улаханнык сыаналанара, онон бу да сырыыга эппиэттээх дуоhунас киниттэн түспэтэҕэ. 1943с. от ыйыгар 113-с мотоинженернай батальоҥҥа түбэhэр. Кини Днепры туоруур понтоннай муоста оҥоhуутугар кыттар. Манна хорсун- хоодуот быhыытын кѳрдѳрбүтүн иhин Степан «Кыhыл сулус» орденынан наҕараадаланар. 1944с. от ыйыттан 43-с гвардейскай танковай биригээдэҕэ автоматчигынан сылдьар, Кенинсберг куораты босхолоhор. Степан Гаврильевич 1946с. сайыныгар дойдутугар эргиллэн кэлэр. Доруобуйатын уопсай туруга да мѳлтѳѳн, ыалдьан 1994с., 73 сааhыгар биhиги кэккэбититтэн туораабыта.