Бологур начаалынай оскуолатыгар үөрэх дьылын саҥа саҕалаан иһэн, 1942с. балаҕан ыйын бүтүүтүгэр бэбиэскэ тутан, фашисткай халабырдьыттартан Ийэ дойдутун көмүскүү барбыта. Николай Елисеевич үөрэнээччитэ, тыыл бэтэрээнэ Матрена Ивановна Тимофеева учууталларын сэриигэ атаарбыттарын маннык ахтыбыта: «Биир сарсыарда учууталбыт хайдах эрэ өрөкүйбүт этэ. Киирээт дорооболоспута, олордо охсубута. Биһиги утары көрөн олорбуппут. Саҥата суох кылаас иһигэр, төттөрү-таары хаамыталаабыта: «Оҕолоор, мин Сэбиэскэй Армия кэккэтигэр ыҥырыы туттум. Онон эһиэхэ бэйэм үтүө баҕаларбын этэбин». – диэтэ. Тохтоон остуол таһыгар тура түспүтэ. Салгыы холку наҕыл куолаһынан кэпсээн барбыта: «Биһиги Ийэ дойдубутугар түөкүннүү саба түспүт гитлеровскай фашистары утары саа-саадах тутан охсуһа барабын, эһиги билэҕит, истэҕит хаарыаннаах күөх хампа куораттары, сэлиэнньэлэри, дэриэбинэлэри уонна туох да буруйа суох эһиги курдук оҕолору, эбээлэри, эһээлэри өлөрдүлэр, урусхаллаатылар, уоттаатылар онтон да атын араас сидьиҥ быһыылары оҥордулар. Мин киэн туттабын бэйэм төрөөбүт Ийэ дойдум Сэбиэскэй Армия ыҥырыытынан, ол аата бэйэм норуотум, үөрэтэр оҕолорум дьоллорун – соргуларын туһугар туохпун да харыстаммакка фашистары тиһэх чаастарыгар диэри эбэтэр өрөгөйдөөх кыайыынан кынаттанан эргиллиэхпэр диэри, көрсүөххэ дылы, дьоллоох-соргулаах, үөрэхтээх, үчүгэй бэрээдэктээх, чиэһинэй дьон буола улаатыҥ! Мин хайаан да эргиллиэм, күүтээрҥ², суруйуом, суруйаарын!» - диэн баран барыбытын илии тутуһан быраһаайдаспыта. Күн көрөр этэ, ол үрдүнэн тыаллаах, тымныы, дьэкэ-курус күн этэ. Учууталбыт: «Сарсын барабын», - диэбитэ. Биһиги аһынан-долгуйан ытаабыппыт. Сарсыарда эрдэ оскуолаҕа кэлбиппит, учууталбыт Николай Елисеевич ийэтинээн ыҥыырдаах икки ат таһыгар тураллара, биһиги кинилэргэ сырсан тиийбиппит. Учууталбыт уһун суппуун сону, хара саары этэрбэс кэппит этэ. Ийэтэ Ирина оччоҕо эдэр хоодуот дьахтар этэ. Биһиги учууталбытын ыраахха дылы атаарбыппыт». Николай Елисеевич 1943с. сэриигэ бааһырбытыттан өлбүтэ. Саратовскай уобалас Красноармейскай куоратыгар көмүллүбүт.