Георгий Романович 1920с. муус устар 13 күнүгэр Амма улууһун Бологур нэһилиэгэр төрөөбүтэ. Кыһыл Армия кэккэтигэр 1942с. от ыйын 11 күнүгэр ыҥырыллыбыта. Челябинскай куорат аттыгар байыаннай бэлэмнэниини барбыта. Бу үөрэнэрин кэмигэр Георгий Романович бэйэтин үчүгэй спортсмен быһыытынан көрдөрбүтэ. Ол курдук, хайыһар күрэҕэр, ытыыга өрүүтүн бастыҥнар кэккэлэригэр сылдьара, бастакы миэстэни ылара. 1942с. фроҥҥа барбыта. «Кыһыл Знамя», Суворов, Кутузов орденнаах 4-с гвардескай, Сталинградскай механизированнай корпус сэриилэ´эр армиятыгар сылдьыбыта. Степановка диэн дэриэбинэни босхолуур уот будулҕан кыргыһыыга табыллан госпиталга 1 ый эмтэнэр. Чааһыгар төннөн сэриилэҕэ сылдьан Успеновка сэлиэнньэтигэр иккиһин бааһырар. Онтон 5-с гвардескай ударнай армия 54 –с Макеевскай стрелковай дивизиятыгар сулууспалыыр.1943с. сэтинньи 28 күнүгэр Днепр өрүһү туорааһыҥҥа Георгий Романович улаханнык бааһырар, госпиталга эмтэнэн баран, 1944с. доруобуйатын туругунан дойдутугар төннөр. Армияттан кэлээтин кытта Жиганскайдааҕы 7 кылаастаах оскуолаҕа военругунан ыыппыттара. Манна кини 2 сыл үлэлээн баран Верхоянскайдааҕы орто оскуолаҕа военругунан анаммыта. 1948с. Амма орто оскуолатыгар кэлэн биир сыл үлэлээн баран төрөөбүт Бологуругар кэлбитэ. Күһүнүгэр Болугур начаалынай оскуолатыгар үлэҕэ киирбитэ. Бологурга учууталлыыр кэмигэр 1949 -1953с. Дьокуускайдааҕы педучилищены кэтэхтэн үөрэнэн бүтэрээт салгыы СГУ историческай факультетыгар кэтэхтэн үөрэнэ киирбитэ. 1960с. үрдүк үөрэҕин бүтэрэн история учууталын идэтин ылбыта. Георгий Романович Бологур орто оскуолатыгар 1981с. дылы үлэлээбитэ. Кини РСФСР норуотун үөрэҕириитин туйгуна, кэлин Дьокуускай куоракка олорбута. Кырдьаҕас учуутал бочуоттаах сынньалаҥҥа да олорон, дьонун- сэргэтин туһугар үлэлээбитэ, айбыта. Төрөөбүт дойдутун, Бологурун сирин –уотун, историятын, номохторун хомуйан суруйбута. «Болугур олохторуттан кэпсээннэр» - 1999с., «Болугур»-2000с. кинигэлэрэ үөрэппит оҕотун Ньургун Васильевич Гольдеров көмөтүнэн бэчээттэммитэ. 2009с. муус устар 8 күнүгэр биһиги кэккэбититтэн туораабыта.