Ийэм Мотрена Егоровна Павлова (Бурнашева) тастыҥ быраата Михаил Дмитриевич Павлов 1918 сыллаахха Омоллоон (Бологур) нэһилиэгэр тɵрɵɵбʏт. Сэттэ кылааһы бʏтэрэн баран Амма-Наахара оскуолатыгар математика учууталынан кэлбит. Алгебра, физика, геометрия уруоктарын ʏɵрэппит. 1983 сыл балаҕан ыйын 20 кʏнʏнээҕи “Коммунизм тутуутугар” хаһыакка Н.Тимофеев “Кʏндʏтʏк саныыр учууталларым” ыстатыйатыгар бу курдук суруйбут:”Yɵрэтэр предметтэрин кыһанан туран ɵйдɵнɵр гына лоп-бааччы быһаарара. Өссɵ опыт быһыытынан алгебраны нууччалыы ʏɵрэппитэ. Кини учуутал быһыытынан уратытынан куруутун оҕолор ортолоругар сылдьара, кинилэри итэҕэйэрэ, ырыаҕа-ʏҥкʏʏгэ ʏɵрэтэрэ, маассабай илии-атах оонньууларын тэрийэрэ, онно бэйэтинэн кыттара. Билигин санаатахха тʏʏн эрэ утуйар уонна эргиччи сылдьар быһыылааҕа. Ол иһин буолуо, оҕо-аймах олус ытыктыыра. Оройуон ʏчʏгэй учууталын быһыытынан сайыҥҥы каникулга Москваҕа экскурсияҕа баран кэлбитэ. Сэрии иннигэр ʏɵрэх оройуоннааҕы салаатыгар ɵрɵ таһаарыллан ʏлэлээбитэ, онно сэбиэдиссэйдии олорон Ийэ дойдутун немецкэй-фашистартан кɵмʏскʏʏ ытык сэриигэ барбыта уонна кыргыс хонуутугар охтубута. Yрдʏк ʏɵрэхтэнэн ыччаты салгыы ʏɵрэтэр сырдык ырата туолбатаҕа”. 1943 сыл олунньу 22 күнүгэр 12-с гвардейскай стрелковай корпус 19-с хайыһар биригээдэтэ Старай Русса куораты босхолуур кытаанах санаалаах ɵстɵɵҕʏ утары туруммута. Ильмен кʏɵл ʏрдʏк биэрэгиттэн фашист артиллерията, миномета быыстала суох кʏнʏ быһа кыдыйара, халлааҥҥа буомба эстэрэ. Ол кырыктаах кыргыһыыга Ильмень киллэм мууһун анныгар ʏгʏс саха саллаатын сырдык тыына быстыбыта... Биһиги таайбыт кʏɵлʏ туораан ɵлɵɵрʏ сытарын, Амматтан сылдьар М.С.Никитин кɵрɵн ааспытын туһунан кэпсээбит. Таайбыт нууччалыы ʏчʏгэйдик билэр буолан рота хамандыыра эбит. 1943 сыл олунньу 23 кʏнʏгэр былаҕайга былдьаммыт буойуттар кэриэстэригэр Ильмень кʏɵл кытылыгар ɵйдɵбʏнньʏк пааматынньык туруорбуттар. Михаил Дмитриевич Павлов туолбатах ыратын биһиги балтылара, аймахтара салгыыбыт. Ийэтин Павлова М.Е.ахтыытыттан суруйда тастыҥ балта Анна Яковлева, «Амма олоҕо» хаһыат, 01.05.2015 сыл   (Быһаарыы: Павлов М.Д. 24.06.1943 с. “Социализм тутуутугар” хаһыакка бэйэтин суругар “Соҕуруу фронт, Н-скай гвардейскай-сталинградскай чааска сулууспалыы сылдьабын, отделение командирабын” диэбит)